fr_FR

Մեր լուրերը

Անտրէ Մանուկեան - Հայրենազուրկը Դասական, արդիական, ժողովրդային, ճազ․․․ երաժշտութեան այս այլազան ոճերը ի մի բերող այս մշակութային նախաձեռնութիւնը հաղորդակցութեան զուգահեռներ կը նետէ հայոց աշխարհին եւ Ֆրանսային միջեւ։ Արուեստագէտին խօսքը «Արեւելքը․․․ մեծ հայր-մեծ հայրերս վտարուած էին հոնտեղէն ․․․ երկար ատեն տանիլ չէի կրնար անոր չափազանցութիւնները, շաքար-մեղրը, փոթորկոտ կիրքերը... Մինչեւ որ օր մը, դաշնամուրի մը առջեւ... վերայայտնագործութիւն․․․ «հայկական բան մը կը նուագէ՞ք մեզի համար»․․․ Մեծ մամայէս մնացած եղանակ մը, պղտոր․․․ վարանոտ մատներէս իրարու ետեւէ հատիկ-հատիկ կաթող հնչիւններ... «Էրիք Սաթիի կը նմանի...» Ու ահա, պարսկական սրբազան թմբուկներ, հայկական դուդուկ, թաւջութակահար ու սուրիացի երգչուհի մը իբրեւ զէնք ու զինակից, ահաւասիկ կ'արշաւեմ հնչիւնային նոր տարածքներու վրայէն՝ անդին հրելով միտքին գծած սահմանները՝ ծիրագծելու համար եզրերը կորուստեալ դրախտին՝ Վիեննայէն Սամարքանտ, որոնելու «սփլինի» բեկորներ՝ վերագտնելու համար, համերգի մը ընդմէջէն նախնիներուս ոգին։» Առաջին մաս՝ Թումանեան մէկ «Թումանեան մէկ» համոյթին նպատակը հայկական երաժշտութեան յառաջմղումն է, մասնաւորապէս լարային քառեակի համար գրուած գործերուն, որոնք տակաւին մեծապէս անյայտ են Արեւմուտքի մէջ։ Համոյթին անունը խոնարհում է հայ մեծագոյն գրողներէն մէկուն՝ Յովհաննէս Թումանեանին։ Ջութակահար եւ համոյթի հիմնադիր Դաւիթ Յարութիւնեանը ծնած է Թումանեան 1 հասցէին (Երեւան)։ «Թումանեան մէկ» անուանումը, այսպիսով, յարգանքի կրկնակի տուրք է։ Սենեկային երաժշտութիւն նուագող հանրայայտ երաժիշտներէ կազմուած համոյթը իր նուագացանկը հիւսած է հայ ժողովրդային երաժշտութեան ակունքներուն դիմելով եւ Արամ Խաչատուրեանի առաւել յայտնի գործերու մշակումներով։